Nafarroako Gobernuko Hezkuntza Departamentuak ikastetxetan hobekuntza lanak egiteko 1.000.000,00 euroko aurrekontua duen dirulaguntzen ebazpena argitaratu du. Zehazki, 65 Udaletxe edo Kontzejuetako 69 ikastetxeetan eginen dira lanak. Guztiak, Haur Hezkuntzako 2. Zikloko edo Lehen eta Bigarren Hezkuntzako eskoletan. Eskualdean, honako ikastetxe hauek jasoko dute diru-laguntza: Iruritako eskola, Goizuetako Andres Narbarte Xalto eskola, Aresoko Nazabal eskola, Legasako eskola, Lesakako Irain eskola, Doneztebeko San Migel eskola eta Mendaur institutua eta Narbarteko Arotzenea eskola.
Hezkuntza Departamentuak pasa den abenduan argitaratutako deialdiaren helburua da ikastetxe publikoetan premiazko eta ezinbesteko esku-hartzea eskatzen duten obrak finantzatzea. Diruz lagundutako lanen artean honako hauek aurkitzen dira: berogailuaren edo elektrizitatearen instalakuntza eta iturgintza eta saneamenduko instalazioa, edo energia aurreztera eta energia-eraginkortasuna lortzera bideratutako jarduerak (estalkiak, fatxadak eta kanpoko arotzeria eta berogailu eta argiteriako instalazioak). Lan horiek 2020ko uztailaren 30a baino lehen hasi eta urte bereko urriaren 1erako amaitu beharko dira.
Diru-laguntzak ordaintzeko, ordainketa bakarra eginen da obrak akitzean edo ordainketa partzialak honako ezaugarri hauen arabera: %25 kontratistari ordaindutako obraren ziurtagiriak obren hasieran aurreikusitako aurrekontuaren %25etik gorakoak badira; %50 aurreikusitako aurrekontuaren %75a gainditzen badute eta gainerako %25a obrak amaitzean, aurrez justifikatuta.