Nafarroako Gobernuko Landa Garapen Departamentuak eta Garapen Ekonomiko eta Enpresarialeko kabineteak deituta, administraziotik Manu Aierdi eta Itziar Gomez kontseilariak eta bertze arduradun instituzionalak izan ziren. Bilera horretan, Imanol Iberok agroindustriaren ordezkariei (Alinar, conserbro, AN eta agrifood klusterrari hain zuzen) gaur indarrean dagoen elikadura katearen legearekin bete dezaten eskatu zien, ekoizpen prezioaren azpitik erostea debekatzen baitie.
Zentzu horretan ere, Nafarroak dituen eskumenak baliatuz, lege hori bere osotasunean bete dadin lan egin dezatela eskatu zien, arduradun instituzionalei. Horretarako Turismo eta Kontsumo Departamentuari beharko dituen giza baliabide eta baliabide ekonomikoak eskaini diezaioten, lege horren betetzea bermatu dezan. Aipatzekoa da EHNE-Nafarroako lehendakariak ez zuela gai zehatz honen inguruan erantzunik jaso, ez agroindustriaren bozeramaileen partetik ezta administrazioaren partetik ere.
Hori dela eta, EHNE-Nafarroak egoera irregularrak jasan ditzazketen nekazariei zuzendu zaie, euren mozkinak ekoizpen kostuen azpitik saltzeko behartuta sentitzen denari, egoera horren frogak bildu eta gorde ditzan, jakin dezala prezio justua bermatu behar duen lege bat badela eta EHNE sindikatua lagun duela egoera salagarri horiek bideratzeko.
Bileran epe luzera begira ere hausnartu egin zuten. Zentzu horretan EHNE-Nafarroak «gure ekoizpen sistemaren erresilientzia falta» salatu zuen, baita «errelebo iraunkor bat bermatzearen beharra ere». Aldaketa klimatikoa eta despopulazioaren erronkari benetako arduraz erantzungo dion erreleboaz hitz egin zuen. Nekazarien etengabeko galera salatu zuen, «azken hamarkadetan bultzatutako eredu batere erresilienteak sortutako egoera. Lurren pilaketa handia sortzen ari dena, politika desberdinek bultzatua Nekazaritza Politika Baturatuak besteak beste, nekazari txikiaren desagerpenera bultzatzen ari duena».