Apirilaren 23an, ortzegunean, Gartzaingo Etxerritik Ariztegira doan errepidean (NA-2595 errepidea) eta Mugairi eta Sunbilla tartean arituko dira asfaltatze lanetan. Ariztegiko errepidearen kasuan, itxi eginen dute 07:30etik 13.00ak arte. Hortaz, auzotarrek ordezko bideren bat erabili beharko dute.
Apirilaren 24an, ortziralean, N-121A errepidean Sunbilla-Mugairi tartean segituko dute zolaberritze lanetan, eta aldi berean NA-2602 errepidean ere, Arizkungo Aintzialde auzoan. Kasu honetan, pasabidea itxi eginen dute 09:00etatik 18:00etara, eta auzotarrek ordezko bideak erabili beharko dituzte.
N-121A errepidean Sunbilla eta Mugairi arteko zatian lanean ariko diren bi egunetan, ortzegunean eta ortziralean, 07:30ean hasiko dira eta 18:00ak aldera akituko dute. Tarteka auto ilarak sortzea aurreikusten dute eta, horregatik, «lasaitasuna eta bidaiatu behar duenari garaiz ateratzea» eskatzen diote.
Obrak Nafarroako Herri-lan eta Azpiegitura departamentuak sustatzen ditu, Mugairiko zainketa zerbitzuaren bitartez, eta Construcciones Mariezcurrena enpresak egiten ditu.