Ezagutu gaitzazu! Horixe daBaztan-Bidasoa Turismo Elkarteak derrigorrezko etxeratze honetan abian jarri duen kanpaina.
Zu ezin zara gu bisitatzera etorri, baina gu zure etxean sar gaitezke. Sare sozialak baliatuko ditugu gure kideak nortzuk diren eta konfinamendu egoera hau nola jasaten ari diren ezagutu dezazun. Zure baimenarekin…zure etxean sartuko gara!ª, diote oharrean.
Landetxeak, hotelak, kanpinak, jatetxeak, aktibitate eta zerbitzu enpresak… Denak itxita daude. Itxita bai baina ez geldirik, dagoeneko webgunean eta sare sozialen bidez hedatu dituzten bideoetan ikus daitekeenez. Egunero bideotxo bat zintzilikatuko dute beraien sare sozialetan. «Leihotik begiratzerakoan mundua gelditu dela iduri badu ere, gure kideak lanean dabiltza buru-belarri itzulera prestatzen», diote Baztan-Bidasoa Turismoa Elkartetik eta horren erakusgarri dira kideek prestatu dituzten bideoak. Eskualdeak eskaintzen dituen aukera ugariak ezagutzeko bertze modu bat da, etxe barneko lana plazaratuz.
Beraien aktibitatea ezagutzeko sare sozialetan jarraitzeko aukera zabaldu dute eta elkartearen eta eskualdeko albisteak etxean jaso nahi izanez gero, eman izena beraien webguneko Newsletter-ean eta bi astetik behin beraien berri izanen duzu.