Era.eus webgunean sartuta, orrialdearen eskuinaldean, Eguneko kultur proposamena izeneko atala sortu dute eta bertan egunero ipuin, musika, antzerki edo bestelako ikuskizunen baten berri emanen dute.
Eguneroko pilula horiez gain, bestelako proposamen batzuk ere bildu dituzte eta webgunearen albiste nagusian jarri ikusgai. Egoerara egokitzen: eguneko kultur proposamenak etxeraino izenpean orduka eta jardueraka sailkatu dituzte ikuskizunak, taula batean jasoz. Adibidez, 08:00etan ERAk eginen duen eguneko kultur proposamena zintzilikatuko dute, 10ak aldera Euskalerria Irratiak emitituko duen “Etxeko ipuhinak” izanen da eta 16:00etan ipuinak, musika eta marrazketarako ordua eskainiko dute Irribarrez webgunean. Baina bada hori baino gehiago ere, dantza eta kirola egiteko aukerak ere bildu dituzte, esaterako.
Konfinamendu garai honetan euskara zaintzea ere beharrezkoa denez proposatuko dituzten jarduera guztiak euskaraz izanen dira. Beraz, eman diezaiogun tokia euskarari baita plataforma digitalen bidez ere.