Lesakan eta Leitzan ariko dira kantari Bardoak otsailaren 14an

Finalaurrekoan abestuko duten taldeak zeintzuk izanen diren erabakiko da asteburuan.

Eskualdera eginen du bisita ostiralean Nafarroako Taldekako Bertsolari Txapelketak. Egun berean, bi hitzordu dituzte bertsozaleek aukeran. Lesakako Arrano Elkartean, 19:00etatik aitzinera, Arranopola eta Bertsopiztiak taldeak ariko dira kantuan eta Leitzako Atekabeltz Herri Gunean, berriz,  19:30ean egin dute hitzordua. Atekaberts komeni eta Hego haizea taldeak igoko dira oholtzara. Finalaurrekoetarako txartela dute jokoan.

Arranopola taldea Bortzirietako Bertso Eskolako heldu eta gazteen taldeak bat eginiz sortu dute. Ane Telletxea, Eneko Fernandez Maritxalar, Erika Lagoma Pombar, Estitxu Arozena Albizu, Etxahun Azkarraga, Iban Garro Alzuri, Iratxe Muxika Carrion, Jon Silveira, Josu Sanjurjo Altzuri, Lide Igoa, Ninbe Urtxegi eta Uxue Mesa dira taldekideak.

Leitzako Atekaberts komeni da eskualdeko ordezkariak biltzen dituen beste taldea. Aitzol Eizmendi, Ander Fuentes Itturri Mujika, Ane Intxausti, Iñigo Gorostarzu, Joanes Illarregi Marzol, Migel Mari Elosegi Luze, Mikel Azpiroz Txotxa eta Xabat Illarregi Marzol dira partaideak.

Bertsopiztiak taldea Barañaingo gazteek osatu dute: Amaia Lasheras, Beñat Astiz, Enma Murillo, Idurre Villanueva, Irati Majuelo Itoiz eta Zuhara Zaratiegik.

Hego haizea taldea Barañaingo Haizea elkartean bertsotan aritzeko astelehenero biltzen diren lagunek osatu dute. Ainara Ieregi, Ander Baiano, Endika Legarra Nuin, Iñigo Aranguren "Pika", Sahats Aleman Sadaba dira taldekideak.

 

 

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun