Urrezko Aizkolarien Txapelketaren baitan, gizonezkoen binakakoa eta emakumezkoen banakakoa jokatzen ari dira urte hasieratik. Emakumezkoetan lau aizkolari ari dira lehian: Nerea Sorondo beratarra, Itxaso Onsalo aresoarra, Maika Ariztegi iturendarra eta Irati Astondoa bizkaitarra. Guztira hiru jardunaldi jokatu dituzte, eta horietan azkena, asteburuan jokatu zuten Aian (Gipuzkoa). Sorondok bizkaitarra izan zuen kontrario baina erraz gailendu zen beratarra. Lanak borobitzeko bortz minutu eta 43 segundo behar izan zituen eta Astondoak zazpi minutu eta 28 segundo. Gisa honetara, txapelketako bigarren garaipena eskuratu du; lehenbizikoa Onsaloren aurka irabazi zuen.
Gizonezkoetan, berriz, hirugarren eta laugarren jardunaldiak egin zituzten asteburuan. Aiako hirugarren saioan Ugaitz Mugertza II.ak eta Julen Alberdi Txikia IV.ak Ruben Saralegi leitzarra eta Eneko Otaño izan zituzten arerio. Lehenbiziko bikotea nagusitu zen. Lanak 21 minutu eta lau segundotan egin zituzten eta Saralegik eta Otañok 23 minutu eta 39 segundo behar izan zituzten.
Iraetan jokatutako laugarren jardunaldian ere eskualdeko aizkolariak garaipenik gabe gelditu ziren, baina lehia estuagoa izan zen. Iker Vicentek eta Jesus Mª Mujikak 20 minutu eta 30 segundotan bukatu zituzten lanak eta Mikel Larrañaga eta Jon Rekondo leitzarrak 16 segundo gehiago behar izan zituzten.
Hurrengo hitzordua otsailaren 3an Abadiñon izanen dute eta otsailaren 5ean Beasainen ariko dira.