Elizondon egun handia izaten da San Anton eguna. Goizetik, Francisco Joaquin de Iriarte Zahar Etxearen aldeko errifaren azken txartelak saltzen ibiliko dira albinteak. Lehenbiziko saria, Aspina elkarteak emandako aretzea izanen da, bigarrena zerria, hirugarrena bi bildots eta laugarrena urdaiazpikoa. Zozketa, berriz, 13:00etan eginen da Balleko Etxeko balkoian. Bertsolariak ere ariko dira eguerdian eta Baztanzopak eskainiko dituzte 11etatik aitzinera.
Lesakan Endara auzoko San Anton baselizaren inguruan eginen dituzte ospakizunak. Ortziralean mezak izanen dituzte 10:00etan eta 11:00etan. Baina ondoko igandean izaten dute erromeri giroa. Igande goizean mezak izanen dira orduero (10:00, 11:00 eta 12:00) eta trikitixa doinuak, erroskila saltzaileak eta bertze hainbat kontu izan dira. Lesakatik eta inguruko herrietatik oinez, bizikletaz, zaldiz eta, batez ere, autoz hurbiltzeko ohitura handia izaten da. Lesakatik, mendi ibilaldia antolatu du Beti Gazte elkarteak 08:00etan plazatik abiatuta. 17:00etan dantzaldia izanen da Plaza Zaharrean, Laiotz taldearekin.
Zubietan ere San Anton egunak tradizio handia izan du. Izen bereko baseliza moldatu zutenetik, egun horretako meza ere berreskuratu dute. Lehen aziendak emateko ohitura izaten zen, baina hori galtzen joan da. Ostiral goizean, beraz, meza izanen da eta ondotik hamaiketakoa eskainiko dute baseliza atarian. Arratsaldean udalak txokolatea banatuko du herriko estalpean eta Joxe Angel akordeoilariarekin dantzaldia izanen dute arratsean, 21:00 arte.
Erratzun ere egun berezia izaten da San Anton Eguna, batez ere, emakumezkoentzat, eta aurten ere hutsik egin gabe, hainbat emakume elkartuko dira afaltzera