Eskualdeari dagokionez, Baztanen sumatu dute eraginik handiena. Argindar-mozketak ez ezik, hainbat arbola erori dira errepideetara. Aniz eta Irurita arteko errepidera erori ziren horietako aunitz eta, hainbat orduz, Oronozko suhiltzaileek bidea garbitu arte, ez zen Zigatik ateratzeko edo ailegatzeko modurik izan. Lekarozen eta Elizondoko Santiago karrikan ere zuhaitzak kendu behar izan dituzte goizaldean.
Oronozko parkeko suhiltzaileak 18:45ean joan ziren Gaztelura. Han, haizeak argiteria publikoko zutoin bat hautsi zuen eta kable bat zintzilik utzi zuen karrikan. Oronozko suhiltzaileek Basataundiko tunelean eroritako xafla bat ere kendu zuten.
Azkenik, atzo gauerdian, Arantzako Eguzkialdea auzoan mendiko sutea izan zuten. Haizearekin zuhaitz baten adarrak linea elektrikoaren kable bat ukitu eta suak hartu zuen mendia. Oronozko parkeko suhiltzaileek, Trinitarioetako unitateen laguntzarekin, sutan zegoen hektarea erdi sastrakadi eta larre itzali zuten eta, zorionez, sua ez zen inguruko pinudi edo hariztietara iritsi. Gero, euria hasi zuen eta horri esker sutea abudo itzaltzea lortu zuten.