Joan den azaroaren 29an Huescan (Espainia) banatu zituzten aurtengo Porc d'Or sariketako sariak. Zerri-aziendekin lan egiten duten mila profesional bildu ziren, tartean INTIA Nafarroako enpresa publikoaren barne dauden hainbat abeltzain. INTIAren barne dauden 11 ustiategik parte hartu zuten eta horien artean bik lortu zuten saria: Asier Omart Iparrea elizondoarrak eta Mikel Irigoien Irazoki etxalartarrak.
Ustiategien produktibitatea eta errendimenduan oinarrituz ematen dituzte sariak, kategoriaren arabera banatuta. 200 zerri arte dituzten ustiategiak lehenbiziko kategorian sartzen dira; 500 zerri bitarte dituztenak bigarren kategorian; mila bitarte dituztenak hirugarren kategorian; 2.000 zerri arte dituztenak laugarren kategorian eta 2.000 zerri baino gehiago dituztenak bosgarren kategorian. Omart eta Irigoien lehenbiziko kategorian sartu dira. Elizondoarrak Erditze Tasaren araberako saria eskuratu du eta etxalartarrak bizitza-luzerari dagokiona.