Denboralearen ondorioak

[30 ARGAZKI] Bidasoak gainezka egin du Bortzirietan, Malerrekan eta Bertizaranan eta zuhaitzak errepidera erori dira hainbat tokitan

Ttipi-Ttapa 2019ko abe. 13a, 08:34

Nafarroa iparraldean alerta ezarri du Meteorologiako Estatu Agentziak

Haize zakarrak eta euri jasek eragozpen ugari sortu dituzte eskualdean. Bidasoa ibaiak hainbat puntutan gainezka egin du. Hala nola, Beran, Etxalarko Bentak eta Lesaka lotzen dituen errepide zaharrean, Sunbillan, Donezteben eta Narbarten. Bertze toki anitzetan, berriz, zuhaitzak erori dira eta erortzak ere izan dira. AP15 errepidean, berriz, Areso parean, kamioi bat errepidetik atera da. Zuen inguruan eragozpenik sortu bada, bidali mezua 744 48 43 61 zenbakira.

Doneztebeko behategian azken 24 orduotan 110 litroko prezipitazioak izan dira eta Beran 70 litro neurtu dituzte. Bidasoan ez ezik, Urumea aldean ere erne ibiltzeko adierazi dute eta Endarlatsako estazioan alerta gorria ezarri dutela gogorazi dute Nafarroako Gobernutik.

Doneztebe

Doneztebeko Aparan industrialderako sarreran ur putzuak sortu dira eta hainbat etxetara ura sartu da. Bideoa: Juan Goñi.

Narbarte

Narbarten ere gainezka egin du ibaiak. Bideoa: Juan Goñi.

Bortziriak

Berako Zubixabal inguruan ura garajeetan sartu da eta karrikan zeuden hainbat auto ere kaltetu dira.

Igantziko Bentatik Igantzi eta Arantzarako bidean hainbat tokitan erortzak izan dira eta putzuak daude.

Lesakako zubitik Lesakarako bidean hainbat zuhaitz errepidera erori dira eta auto ilarak sortu dira. Txandakako pasabidea ematen ari dira eta trafikoa motela da.

Etxalarren ere zuhaitzak errepidera erori dira eta herrira sartzeko bidea moztuta dago.

Sunbilla

Sunbillan itxura hau izan du ibaiak 09:00 aldera.

Baztan

Elizondon Giltxaurdi kiroldegia itxi egin dute arriskuagatik. Argirik gabe gelditu dira eta larrialdi zerbitzuek hala aholkatuta, instalazioak itxi egin behar izan dituzte. Baztanen, Otsondo aldean, dozena bat zuhaitz errepidera erori dira eta bidea arriskutsu dago eta Baztan ibaia ere goi-goian ibili da, gainezka egiteko zorian. Bideoa: valledebaztan.com.

Bertzalde, ikusgarria izan da Elizondoko Berro auzoan errepidera erori den harritzarra.

 

Leitza

Paper-lantegiaren ondoan ez atzera eta ez aurrera errekan gelditua zen behor bat erreskatatu dute gruarekin.

Goizueta

Goizuetan, berriz, Goizueta eta Leitza arteko errepidea kaltetu du denboraleak.

Behobia

Eskualdetik hurbil, Behobian ere Bidasoa zuhaitzak errepidean.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun