Ortzirale eguerdian Agurainen, aizkolari lehian, Jon Rekondo leitzarra eta Mutrikuko Ugaitz Mugertza II.a izanen dira aurrez aurre. Abenduaren 14an Otxandion jokatuko den finalerdirako txartela izanen dute jokoan, hamar kanaerdikotara. Harrijasotze txapelketan Jon Gisasola Zelai V.a mallabitarra eta Beñat Telleria lasartearra ariko dira nor baino nor gehiago, ehuna kiloko zilindro zaharrarekin, kubikoarekin eta borobilarekin. Ingudean, Estibaliz Cidad arabarra eta Karmele Gisasola Zelai III.a bizkaitarra ariko dira 10 kiloko ingudearekin, minutu eta erdiko lanean.
Larunbat arratsaldean Mendaron, aizkolarien lehen finalerdia jokatuko dute Azkoitiko Julen Alberdi Txikia IV.ak eta Beizamako Eneko Otañok. 12 kanaerdiko lana izanen dute eta Urtezahar eguneko finalerako txartela jokoan. Harrijasotzen, Elgetako Imanol Albizu Goikoetxe eta Zarauzko Mikel Lopetegi Urra ariko dira. Ingude altxatzen, berriz, Getxoko Nerea Egurrola eta Iturengo Maika Ariztegi ariko dira.