Auzitegi Nazionaleko epaiaren «bidegabekeria» salatzeko, gure eskualdetik ere hainbertze lagun bizikletan joan ziren atzo Altsasutik Iruñera, Duintasunaren Martxan, eta, ondotik, Nafarroako Justizia Auzitegiaren aitzinean protesta egin zuten bertze milaka pertsonekin batera. Auzia auzitegi horretan epaitu behar izan zuela salatu zuten, eta ez Espainiako Auzitegi Nazionalean, eta «justizia eta demokrazia» eskatu zituzten.
Goizean goiz, Altsasutik Iruñerako bidea hartu zuten 150 bat lagunek, bizikleta gainean. Zortzi herritan egin zituzten geldialdiak —Altsasun, Urdiainen, Bakaikun, Etxarri Aranatzen, Lakuntzan, Uharte Arakilen, Hiriberrin, Irurtzunen eta Berriozarren—, eta horietako bakoitzean zigortutako zortzi gazteetako bakoitzaren izena eta irudia zuen kartel bat hartu zuten, Iruñera eramateko.
Eguerdian, Berriozarren gelditu zen martxa. Han, Raul Maiza alkateak agurtu zituen: «Zuekin gaude; zuen borroka gurea da». Ondotik, boluntarioek prestatutako janaria bazkaldu zuten, eta Iruñerantz abiatu ziren.
Antolatzaileek jakinarazi zutenez, 52.000 lagun inguru bildu ziren mobilizazioan. Eskertu zuten erantzuna: «Beste behin, gure aurreikuspenak gainditu dituzue».