Bertsokabi-Eugenio Arraiza Sariketako hiru kanporaketak jokatu ondotik, finala bertzerik ez da falta sariketa borobiltzeko. Kanporaketa bakoitzean irabazle izan diren bikoteak ariko dira finalean kantari: Illarregi eta Irastortza, Zapiain eta Sanjurjo, eta Majuelo eta Untxalo. Maialen Belarra ariko da gai-jartzaile, eta publikoko bortz lagunekin batera, Joseba Beltza eta Nerea Bruñok eginen dituzte epaile lanak. Horiek guztiek erabakiko dute nork diren 2019ko sariketan txapeldun.
Orain arteko kanporaketekin alderatuz, aldaketa batzuk izanen ditu finalak. Bertsolari guztiak ofizioka ariko dira, zortziko ttikian zein hamarreko ttikian, eta bakarkako lanerako zein puntukako saiorako aukera ere izanen da. Kopletan ere ariko dira bikoteak, eta denek izanen dute bertso-jolas bat. Edozein moduz, Nafarroako Bertsozale Elkartetik adierazi dutenez, «ohiko saio eta saio informalaren arteko orekari eutsi nahi dio finalaren ariketa sortak».
2017an abiatu zuen Nafarroako Bertsozale Elkarteak Bertsokabi-Eugenio Arraiza Sariketa eta orduan Alazne Untxalo eta Egoitz Gorosterrazu iturendar bertsolariek jantzi zuten txapela.