Sokatiran Lesakako Beti Gazteko kirolariak ariko dira; arpanean Itxaso Onsalo aresoarrak Mikel Eugi izanen du lagun, txokor biltzen Unai Iantzi aniztarra ariko da eta lasto altxatzen Iñigo Goienetxe amaiurtarrak ordezkatuko du Nafarroako taldea. Txingekin Daniel Saldias arraioztarra ibiliko da eta orgarekin Xabier Urrutia arraioztarra. Gainerakoan, zaku-lasterketan Oskar Aguas, Oier Aizkorbe eta Iñaki Iraizoz, ingudearekin Alex Fernandez, aizkoran Iker Vicente eta harri-altxatzen Jon Irañeta ariko dira Nafarroako taldean.
Txapelketa Bilboko Casilda parkeko zelaian jokatzekoa da eta eguraldi txarra bada, Zorrotza auzoko frontoian eginen dute. 17:00etan taldeen aurkezpena eginen dute eta ordu erdi beranduago hasiko da txapelketa. Sari-banaketa 19:30 aldera eginen dutela aurreikusi dute.