Aipatu egunetan, ibilgailu astunek ezin izanen dute Nafarroa eta Ipar Euskal Herria lotzen dituzten bortz errepide nagusietan zirkulatu: Iparraldeko Autobidean (A1), Leitzarango Autobidean (A-15), Iruñea eta Behobia lotzen dituen N-121-An, Dantxarinean barna pasatzen den N-121-B errepidean, eta Luzaiden barna Nafarroa eta Ipar Euskal Herria lotzen dituen N-135 errepidean. Debekua bigarren mailako errepide sareko hogei bat errepidetara ere hedatu dute.
Bertzalde, Nafarroako Gobernutik jakinarazi dutenez, kamioientzako aparkatzeko eremuak egokitu dituzte. Horien artean, Leitzako industrialdean 35 kamioirentzako tokia egokitu dute eta Baztanen, Zozaiako baskulan, 20 kamioirentzat.
Horrez gain, Ipar Euskal Herrirako bidaia mota guztiak guttienez asteartea arte gibelatzeko eskatu die Gobernuak herritarrei. Hala ere, bidaiak gibelatu ezin badira, aitzinetik Nafarroako errepide-sareko kamerak eta Eusko Jaurlaritzaren www.trafikoa.eus webgunearenak kontsultatzeko aholkatu du, errepidearen egoera ezagutzeko.
Osasun zerbitzuak eta suhiltzaileak
Murrizketak murrizketa, osasun-zentroek eta ospitalez kanpoko larrialdi zerbitzuek normaltasun osoz funtzionatuko dutela adierazi du ohar bidez Nafarroako Gobernuak. Prebentzio gisa, anbulantzia kopurua indartuko dute Bera, Auritz eta Luzaideko osasun-zentroei zerbitzua emateko, eta Nafarroako Suhiltzaileen Zerbitzuaren kasuan, Oronoz-Mugairiko eta Aurizko parke profesionaletan dagoen langile kopurua gehitu dute egun hauetarako eta alerta mezua bidali diete Bera, Lesaka eta Luzaideko boluntarioen parkeko suhiltzaileei.