Joan den astean Nafarroako hainbat txapel banatu ziren Iruñeko sanferminetan. Eguerditan Foru Plazan jokatutako jaialditan. Asteburuan ere jokatu dira hainbat saio eta zenbaitetan, eskualdeko kirolariak nagusitu dira.
Uztailaren 12an, ortziralean, 4x4 sokatira lehiaketa mistoan Beti Gazteko neska-mutilak nagusitu ziren, Berriozar, Txantrea eta Antsoainen aitzinetik. Emakumezkoen aizkora erakustaldian, Irati Astondoak eta Leire Astiazaranek irabazi zuten (11.15), Iturengo Maika Ariztegi eta Aresoko Itxaso Onsaloren (13.03) aitzinetik.
Uztailaren 13an, larunbatean, Nafarroako harrijasotze txapelketa jokatu zen eta Irurtzungo Jon Irañeta nagusitu zen. Denera, 5.337,5 kilo altxatu zituen. Josetxo Urrutia leitzarra bigarren izan zen (4.537,5 kilo), hirugarren Xabier Ariztegi Santxin etxalartarra (4.350 kilo) eta laugarren Iruñeko Albaro Zugarrondo (3.637,5 kiklo).
Uztailaren 14an, igandean, azkenik, Nafarroako binakako aizkora txapelketa eta gurdi-eramate txapelketak jokatu zituzten. Aizkoran, sei kanaerdiko eta sei 60 ontzako mozten bizkorrenak Iker Vicente eta Juan Jose Lopez izan ziren (26.05). Bigarren izan ziren Leitzako Ruben Saralegi eta Zigako Joxean Etxeberria (28.12) eta hirugarren, Leitzako Jon Rekondo eta Oier Kañamares IV.a (28.47).
Gurdi-eramate txapelketan, Arraiozko Xabier Urrutia nagusitu zen, 3 itzuli eta 3,25 metro egin ondotik. Leitzako Josetxo Urrutia bigarren izan zen (bi itzuli eta metro bat) eta ondotik sailkatu ziren Berriozarko Josetxo Aguas eta Iruñeko Alex Fernandez eta Jose Manuel Pascual.