Iera Agirre eta Naroa Elizalde Iruñeko Sanferminetako esku-pilota txapelketa nagusian ariko dira

Ttipi-Ttapa 2019ko eka. 24a, 20:00
Deskargatu Info Ahotsak :
Español English Français Català Galego

Pilota txapelketaren aurkezpenean, Iera Agirre leitzarra, Arrate Bergara, Miren Larrarte eta Andrea Aldaregia.

Emakumezko pilotari onenenek euren lekua izango dute sanferminetako zurrunbiloaren erdian, Laboral Kutxa Emakume Master Cup San Fermin Torneoarekin

Sanferminetako zurrunbiloaren erdian, Labrit pilotalekua izanen da Iruñan ekitaldi gehien jasoko dituen guneetako bat eta emakumezkoen esku pilotak ere izanen du bere tartea bertan jokatuko diren jaialdi ugarien artean, Laboral Kutxa Emakume Master Cup San Fermín Torneoarekin. Iaz hasitako ibilbide arrakastatsuari jarraiki, eta Nafarroako Gobernuak emandako bultzadari esker, gaur egungo pilotari onenak bi mailatan lehiatuko dira, 18 urtez azpikoena eta maila nagusian. Azken honetan ariko dira ekainaren 24ko aurkezpenean izan den Iera Agirre leitzarra eta Naroa Elizalde zubietarra.

Aurten nabarmendu beharrekoa da 18 urtez azpikoen txapelketan arituko diren pilotari guztiak nafarrak izanen direla, harrobiarekin lan ona egiten ari direnaren seinale, kirol honen etorkizuna nolabait bermatuz.

Finalak uztailaren 13an, larunbatean, jokatuko dira Iruñako Labrit pilotalekuan, 11:30etik aitzinera, eta bi partidak ETB-k zuzenean botako ditu, baina txapelketa luzeagoa izanen da eta finalerdiak Lizarran jokatuko dira, uztailaren 6an edo 7an.

Ekainaren 24ko aurkezpenean Iera Agirre, Arrate Bergara, Miren Larrarte eta Andrea Aldaregia pilotariak izan dira, baita Primitivo Sánchez, Nafarroako Gobernuko kirol zuzendari ordea ere; Maria Caballero, Iruñeko Udaleko kirol zinegotzia; Alicia León, Iruñeko Laboral Kutxaren bulegoko zuzendaria eta Miguel Pozueta, Nafarroako Pilota Federazioko lehendakaria. Erakunde hauen guztien laguntza eta babesa ezinbestekoak izan dira ekitaldia antolatu ahal izateko.

 

18 urtez azpiko finalerdiak

Leire Oskoz-Ane Mendiburu / Katixa Agorreta-Arrate Bergara

Eider-Salbide-Olatz Ruiz de Larramendi /Udane Vergara-Garazi Lasa

 

Nagusien mailako finalerdiak

Amaia Jaka-Maite Ruiz de Larramendi /Miren Larrarte-Naroa Elizalde

Iera Agirre-Oihana Orbegozo / Andrea Aldaregia-Amaia Aldai

 

Kirola

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun

Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!