Bi jalditan launa partida jokatuko dituzte, alebin, infantil, jubenil eta senior mailakoak. Azken hiru urteotan Iruñea eta Doneztebe izan dira aurrez aurre finalean. Iaz Iruñeak irabazi zuen, baina aitzineko biak Doneztebek.
Oraingoan ere, finalera sartzeko faborito argia da Doneztebe, itxura batean, lau kategoriatan Ultzamak baino bikote hobeak dituelako. Iruñea eta Baztanen arteko finalerdia parekatuagoa dirudi. Baztandarrak aurten bueltatu dira konpetiziora, urtetan jokatzeari uko egin ondotik. Herriko pilotariekin osatu ditu lau bikoteak.