2013 urteaz geroztik jaiotako neska-mutikoek (ttikiak) 500 metroko ibilbidea izanen dute, 2011-2012 urtekoek (aurrebenjaminak) kilometro batekoa, 2009-2010 urtekoek (benjaminak) 2 kilometrokoa, 2007-2008 urtekoek (alebinak) 4 kilometrokoa eta 2005-2006 urtekoek (infantilak), 6 kilometrokoa.
Lesakakoaren ondotik, ekainaren 2an Iruritan, ekainaren 15ean Beran, ekainaren 30ean Donezteben eta irailaren 8an Anizen. Urdazubin ere egitekoa dute.
Probek ez dute lehiaketa izaerarik izanen; ondorioz, ez dira denborak hartuko, ez da sailkapenik izanen. Proben helburua parte-hartzaile guztiek kirola egitea da, ekitaldi hauetan denek dute tokia. Maila guztiak mixtoak izanen dira. Kaskoa derrigorrezkoa da. Parte-hartzaileek antolatzaileen aginduak errespetatu behar dituzte.
Lasterketa hauek girotzeko inguruko txirrindulari profesional eta ohien laguntza izanen dute eta laguntzaileek emandako opari bikainak zozketatuko dituzte azken egunean. Sari onenak eskuratu ahal izateko, bederen hiru probetan parte hartu beharko da.
Txirrindularitza eskola Lekarozen
Pasa den urtean egindako lanak, fruituak eman ditu. Baztango kasua erraterako. Baztandarra Txirrindulari Elkartea berpiztu da eta 6 eta 14 urte bitarteko neska-mutikoekin txirrindularitza eskola berri bat martxan jarri dute. Apirilatik ekainera, astean behin, Lekarozko kirol instalazioetan biltzen dira.