Bigarren edizio honetan parte hartzaileen kopurua hazi egin da iazkoarekin konparatuz eta, aurtengoak izan duen harrera ikusita, datorren urterako asmoa hazten jarraitzea da. Gainera, Iker Amarika antolakuntzako kideak adierazi duenez, «valentziar pilotan ari diren zenbait pilotarik agertu dute hurrengo urtean erabat irekia den txapelketa honetan parte hartzeko asmoa».
Lehiaketa bi mailatan banatu da eta Azkoitian jokatutako kanporaketen ondotik, Sheila Cueto-Iraitz Huegun (Errenteria eta Donostiakoak), Leire Esnal (Zumaia) eta Eneko Sagarmendiren (Errenteria) aurka arituko dira adimen urritasuna dutenen mailan eta gurpildun aulkikoen artean Joseba Lasa (Lesaka)-Beñat Lizaso (Usurbil) eta Javier Etxezarreta (Donostia)-Asier Navaridas (Sunbila) ariko dira txapelen bila.
«Gure aurpegia zarete. Gipuzkoako Egokitutako Kirolen Federazioak 15 urte bete ditu eta gauza asko egin dira, baina hau aukera izugarria da. Goza ezazue eta dena eman. Ondo pasa eta jakin jende asko izango dela zuei begira, harritu egingo den jende asko, ematen duzuen ikuskizuna oso handia da eta». Hala opa die Blanca Aranguren, federazioko lehendakari ordeak, kantxan dena emateko prest agertu diren zortzi finalistei. Beasaingo alkate, Aitor Aldasorok, deia luzatu zuen kirolari bikain hauek Antzizarreko harmailetatik babesteko.