Julio Sotok bortzekoa osatu du

Bertsolarien doinu eta hitzek zein 1.350 entzuleren txalo zaparradek dardarka jarri zuten Iruñeko Anaitasuna larunbatean, martxoaren 23an. Lau orduz oholtzan egon ondotik, Julio Sotoren bertsoek lortu zituzten puntu gehien, 1.172 zehazki, eta Joxema Leitzaren eskutik jaso zuen bere borzgarren txapela (2010, 2011, 2015 eta 2017). Agurrean islatu zuen bere poza, bizipen ororen gainetik bizitzearen garrantzia ageriko eginez: «Ez da uste bezain zaila zoriona aurkitzea/ besteei bakea eman zein norberak sentitzea/ baldintza derrigorra da orainean gelditzea/ burua atzoan edo geroan ez ipintzea/ nahiz gertatu gozatzea/ bezelaxe sufritzea/ ondoan norbait sortzea/ ondoan norbait hiltzea/ bere poz eta bere min ederra da bizitzea».

Eneko Lazkozek lortu zuen bigarren postua, 1.114 puntu eskuratu zituen. Buruz burukoan ardien azalean jarri, ipuinetako protagonista bihurtu eta txapeldun izateak eraginen liokeen sentsazioaz mintzatu zen. Ezin izan zuen bizi, baina saio osoan entzuleei sentiarazi egin zien.

Hirugarren sailkatu zen, saio ederra eskainita, Xabier Terreros (635 puntu). Joanes Illarregi leitzarra izan zuen atzetik eta lau puntuko aldea baino ez zion atera (631). Parez pare aritu ziren zortziko txikian, errefuxiatu bat etxekotu nahi duen adineko bikote baten sentipen nahasiak ardatz, punta-puntako bertsoak osatu zituzten.

Julen Zelaietak hartu zuen bortzgarren postua, eta ez zen guttiagorako izan. Umorea izan zuen bere bertsoetan osagai nagusi eta kontent hartu zuen merezitako postua. Eneko Fernandez izan zen seigarren eta haren atzetik sailkatu zen Xabat Illarregi. Azpimarragarria da leitzar gazteak egin zuen saioa, eta bereziki zortziko txikian bota zituen bertso ederrak. Hasierako agurrean hasi bezala, gogotsu itxarondako finalaz gozatu ahal izan zuen. Azken postua Xabier Maiarentzat izan zen.