Ttipi Txartela 1998an sortu zuen Ttipi-Ttapa Fundazioak, bere bitartez euskara, tokiko ekonomia eta Ttipi-Ttaparen arteko aliantzak gorpuztu eta biziberritzeko baliagarri izanen zelakoan. Egitasmoak hasieratik harrera ona izan zuen eta, geroztik, urtetik urtera, handitu eta zabaldu egin da komunitatea. Gaur egun aliantza honek berebiziko garrantzia du Ttipi-Ttaparentzat eta arnasa ematen dio Fundazioak dituen jarduera eta egitasmo guztiei.
Deskontuak herriko denda eta zerbitzuetan
Deskontuei buruzko informazio zehatza ageri da txartelarekin batera banatu den eskuorrian. Osotara 66 denda eta zerbitzuren informazioa ageri da eskuorrian, eskualdeka eta arloaren arabera ordenatuak, eta bakoitzak deskontua zertan, zenbatekoa eta dituen baldintzak erakusten ditu.
Hamabostero zozketak
Txarteldunak abantaila gehiago ere baditu. Hamabostero, Ttipi-Ttapari laguntza ematen dioten enpresa, erakunde, elkarte eta argitaletxeek emandako produktuak zozketatzen dira txarteldunen artean. Zozketan sartzeko ez da deitu behar, aleatorioki egiten baita txarteldun guztien artean. Zozketa hauen inguruko informazio zehatza argitaratzen du aldiro Ttipi-Ttapa hamaboskariak eta, informazio gehiago nahi duenak www.ttipitxartela.info webgunea bisita dezake.
Ttipi Txartela izateko 50 euroko kuota ordaintzen da urtean eta dituen abantailen artean sartua da aldizkaria hamabostero etxera bidaltzea.