Ibilgailuak seriekoak dira, baina aldaketa gutti batzuk egin dizkiete, Marokoko basomortuan eta pistetan ibili ahal izateko. Hamar egunez 5.000 kilometro baino gehiago egin beharko dituzte. Madrilgo Jaraman martxoaren 8an eginen den kontzentrazioarekin hasiko da lasterketa eta martxoaren 16an Marrakechen bukatuko da. Denera, 450 ibilgailuk parte hartuko dute.
Profesionalak ez direnei zuzendutako zazpi etapako lasterketa izaten da, eskola zaharreko abentura, eta Panda eta Marbella autoei zuzendua. Lasterketa honek elkartasunari ere tokia egiten dio, Marokoko eskola batendako 20 kilo eskola-material eramanen baitute autoek.