Lehen Mailako pilotariek lehen partida izan zuten Murgiakoa eta azken markagailuek ez dute osotasunean islatzen jokatutako bi partiden oreka eta berdintasuna. Erraterako, Leire Garai arabar gazteak eta Leire Etxaniz egungo binakako txapeldunak 18-11 irabazi zieten Patri Espinar eta Miriam Arrillagari, baina partida nahikoa borrokatua izan zen. Aipatzekoa da, baita ere, pilotariak gero eta ezagunagoak direla gaztetxoen artean eta Usansolokoak hainbat kamiseta eta argazki sinatu behar izan zituela.
Maite eta Olatz Ruiz de Larramendi Eulateko izeba-ilobak ere saiatu ziren Olatz Agirrezabalaga eta Iera Agirre leitzarrari aurre egiten, baina bukaeran amore eman behar izan zuten, 18-12ko emaitzaz. Beraz, nahiz eta banandurik aritu, azken bi txapelketetako txapeldunek irabaziz ekin diote aurtengo lehiaketari.
Promozioko hiru kanporaketetan ere partida ikusgarriak izan ziren, bereziki luze eta lehiatua Oihana Orbegozo-Alaitz Badiola gipuzkoarrek eta Enara Gaminde-Nagore Bilbao bizkaitarrek jokatutakoa. Azkenean, tanto bakar batez, Laukizkoak nagusitu ziren eta hurrengo kanporaketarako sailkatu ziren.
Naroa Elizale zubietarrari dagokionez, Araitz Eizagirrekin batera jokatu zituen bi partidak irabazi zituen: 18-2 Oihane Aizpurua eta June Ugarteri eta 18-9 Nerea Sagarna eta Garazi Elorzari. Hortaz, hurrengo kanporaketarako sailkatu dira Elizalde eta Eizagirre.
Hurrengo jardunaldia Sodupeko pilotalekuan jokatuko da, datorren igandean, otsailak 10.
