Nafarroako Udal Maparen erreforma onartu du Nafarroako Parlamentuak

Ttipi-Ttapa 2019ko urt. 31a, 13:11

Aldeko 26 botorekin eta kontrako 24 botorekin onartu dute erreforma. Horren arabera, 12 eskualdetan banatua gelditu da Nafarroa. Ttipi-Ttaparen eremuari dagokionez, Baztan, Bertizarana, Bortziriak, Malerreka, Urdazubi eta Zugarramurdi Bidasoa eskualdearen barne geldituko dira eta Arano, Areso, Leitza eta Goizueta Larraun-Leitzaldea eskualdearen baitan.

Duela hiru urte hasi ziren Tokiko Administrazioaren Erreformarako Legearekin bueltaka, eta azken orduko aldaketa batzuekin, Parlamentuak ortzeguneko saioan onartu du Udal Maparen erreforma. Azken momentura arte, Orain Bai taldearen aldetik zalantza izan da erreforma aitzinera aterako zen ala ez, baina azkenean, Geroa Bai, EH Bildu eta Ezkerra alderdietako ordezkariek bezala, Orain Baiko parlamentariek ere babesa eman diote erreformari. UPN, PSN eta PPk, iragarri bezala, ezezkoa bozkatu dute.

Ttipi-Ttaparen eremuaren kasuan, Baztan, Bertizarana, Bortziriak, Malerreka, Urdazubi eta Zugarramurdiko 21 udalerrietako 22.355 biztanleek Bidasoa eskualdea osatuko dute, eta Arano, Areso, Leitza eta Goizuetakoak Larraun-Leitzaldearen baitan egonen dira. Azken eskualde horretan, guztira hamar herri dira eta 8.569 biztanle.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun