Gauzatzen ari diren ia mila obrari esker, udalek beharrik premiazkoenei erantzun ahal izanen diete karrikak zolatzeko lanetan, hondakinak biltzeko garbiguneetan, etxebizitzak urez hornitzeko sareetan, banda zabalerako konexioetan, argiteria publikoan eta jendea bizi den guneetarako bideen egokitze lanetan, bertzeak bertze. Obra horiek guztiek 108.253.106 euroko inbertsioa suposatzen dute. Kopuru horren % 57 Nafarroako Gobernuak finantzatuko du eta toki erakundeek % 43.
Datu hauek Landa Garapen, Ingurumen eta Toki Administrazioko kontseilari Isabel Elizaldek eta Toki Administrazioko zuzendari nagusia Xabi Lasak eman fituzte ezagutzera urtarrilaren 12an egindako prentsaurrekoan. Isabel Elizalderen erranetan, “hauxe da, zalantzarik gabe, toki inbertsioetarako orain arte egin den aurrekontu-ahaleginik handiena, inoizko kopururik handiena bideratu baita”.
Finantzaketaren eskualdekako banaketari dagokionez, Bidasoan Tokiko Inbertsioen Planetik 5.360.583,70 euroko inbertsioa egin da (2.523.489,78 euroko ekarpena egin du Nafarroako Gobernuak) eta Finantzarioki Jasangarriak diren Inbertsioei buruzko Planetik 1.376.142,72 euroko inbertsioa (970.166,95 euroko ekarpena). Larraun-Leitzaldean, berriz, Tokiko Inbertsioen Planetik 2.667.205,22 euroko inbertsioa egin da (1.268.926,37 euroko ekarpena) eta Finantzarioki Jasangarriak diren Inbertsioei buruzko Planetik 1.667.782,95 euroko inbertsioa (842.963,44 euroko ekarpena).