Asfalto gainean, 2018ko zortzi karreretatik zazpi (Sonserrano, Kontrabandistak, Fitero, Lesaka, Irurtzun, Malerreka eta Callaghan) irabazi dituzte Beolak eta Iratzokik, beraz, jaun eta jabe izan dira. Garesen bakarrik ez zuten irabazi, matxura batengatik proba utzi behar izan baitzuten. Hain zuzen, Urdazubiko Villares eta Goizuetako Jon Zozaia izan ziren garaile Garesen. Joseba Pikabea beratarra izan da junior mailako gidaririk onena.
Lur gainean, berriz, Iñaki Ubiria gidari lesakarra izan da irabazlea. Sei proba puntuagarrietako (Torres, Autol, Nafarroako Zirkuitua, Allo, Borja eta Korella) bakarra irabazi zuen, baina bere erregulartasunak saria izan du eta 167 puntu pilatu ditu. Iñaki Texeira bigarren izan da 160 punturekin eta parte hartu duen emakume bakarra, Beran jaio eta Lesakan bizi den Banesa San Juan hirugarren izan da, 94 punturekin. Lehen aldia zuen San Juanek gidari lanean.
Mendiko txapelketako sariak ere banatuko dituzte larunbatean Murtxanten. Turismo klasean Lesakako Artiga Motorsport eskuderiko Citroen Saxoarekin txapeldun izan da Iruñeko Daniel del Villar eta Ilargi Sport eskuderiako Asier Almandoz irundarra bigarren. Mendian, formula librean, hirugarren izan da Doneztebeko Xabier Zubeldia.