«Esne Beltzaren disko guztiak bezala koloretsua da, musikalki hainbat estiloren eztanda». Horrela azaldu digu Aitor Zabaleta leitzarrak Esne Beltzaren azken lana. Ni du izena, «letrei begira bakoitzak kanpora eta barnera begira ditugun borrokak adierazten direlako. Abesti gehienetan 'ni' hori agertzen da, gure nahiak eta borrokak, ezinak eta zailtasunak, erraztasunak...».
Berrikuntza batzuk ere baditu Esne Beltzaren zazpigarren eta azken lanak. Alacanteko Marc Dasousa ekoizlearekin aritu dira lanean eta «grabaketak Euskal Herrian eta Alacanten egin ditugu». Esperientzia «ona» izan dela eta «asko» ikasi dutela aitortu digu Zabaletak: «disko bat ateratzean musikalki eta arlo askotan gauza asko ikasten dira». Eta hala, «gustura» gelditu dira emaitzarekin. Bertze berrikuntza bat ere badu: «lehendik egiten dugun musikarekin uztartuz, soinu elektroniko gehiago sartu ditugu». Argitu digunez, «ez dira abesti elektronikoak. Guk egiten diogunari soinu elektronikoaren pintzelada batzuk sartu dizkiogu». Gainerakoan, hainbat estilotako musika bildu dute diskoan: reggaea, rocka, bertsioak, balada... «Guztira hamar kanta dira, intro bat eta bederatzi abesti», dio leitzarrak.
Durangoko Azokan aurkeztu zuten eta aurten «kontzertuak eman eta diskoa jendeari erakutsi» nahi diete. Horrez gain, zuzenekoetan «aldaketak» izanen direla ere aitzineratu digu.
Zabaletaz gain, Iban Zugarramurdi aranztarra ere ikusiko dugu Esne Beltzarekin oholtza gainean. Ez batek eta ez bertzeak ere ez zuten esperoko «lagunartean ongi pasatzeko» sortu zen proiektu hark halako ibilbidea eginen zutenik. Baina arrakasta bistakoa da, eta azken disko hori ere ez da guttiago izanen.