Emakumeen aizkolari txapelketan, Maika Ariztegi iturendarra eta Zeanuriko Irati Astondoa ariko dira nor baino nor gehiago. Metro bateko enborrari hiru korte egin beharko dizkiote.
Gizasemeetan, Mikel Larrañaga eta Eneko Otaño, Jon Rekondo leitzarraren eta Xabier Orbegozo Arria V.aren kontra lehiatuko dira. Bete beharreko lanari dagokionez, erlojuaren kontra 45 ontzako bi enbor (aizkolari bakoitzak bana), zutik kana-erdikoa txanda librean, etzanda 60 ontzako bi enbor (bakoitzak bat) eta txanda librean lau kana-erdiko, bi 60 ontzako eta bi 65 ontzako moztu beharko dituzte.
Harri-jasotzen, azkenik, Gorka Etxebarria oriotarra ariko da Deban. 175 kiloko errektangularrarekin eta 150 kiloko kubikoarekin ariko da, bi minutuko txandatan.