Euskal Herriko bigarren mailako aizkora kanporaketa urriaren 7an jokatuko da Durangon

Ttipi-Ttapa 2018ko urriaren 5a

Hiru kanaerdiko, 60 ontzako bat eta oinbiko bat moztu beharko dute aizkolariek.

Igande eguerdiko lehian ariko diren 12 aizkolarien artean izanen dira Aresoko Asier Pellejero, Berako Oihan Larretxea eta Zigako Joxean Etxeberria

Euskal Herriko bigarren mailako aizkora kanporaketa Durangoko Landa Kirol gunean (Landako I-go Barrio aretoan) jokatuko da urriaren 7an, igande eguerdiko 12:00etan. Kanporaketa ikusteko 15 euroko sarrera ordaindu beharko da. Hamabi aizkolari ariko dira lehian, azaroaren 4an Iurretan jokatuko den finalerako sei txartelen bila. Aresoko Asier Pellejero, Berako Oihan Larretxea eta Zigako Joxean Etxeberria izanen dira eskualdeko ordezkariak.

Beraiekin batera bertze lau aizkolari nafar (Arostegiko Oier eta Julen Kañamares, Dorraoko Iban Resano eta Lezaungo Juanjo Lopez), Arabako bi (Arkaitz Jauregi eta Eloy Corchero) eta Gipuzkoako hiru (Ibarrako Jesus Mari Mujika, Mutrikuko Aratz Mugertza eta Zestoako Luis Mari Txapartegi) lehiatuko dira.

Aizkolari bakoitzak moztu beharreko enborrak: Hiru kanaerdiko, 60 ontzako bat eta oinbiko bat. Lehen sei postuetan sailkatzen diren aizkolariak lortuko dute txartela azaroaren 4an Iurretan (Bizkaia) jokatuko den finalean aritzeko.

Kirola

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun