Nafarroa eta Bizkaiaren arteko herri kirol eta krosfit desafio berezia eginen dute abenduaren 22an

Ttipi-Ttapa 2018ko ira. 25a, 07:17

Ousmane Dramé, Oscar Perez, Unai Bertiz (lekukoa), Xabier Urrutia eta Alex Fernandez, apustua lotuta.

Arraiozko Xabier Urrutiak eta Iruñeko Alex Fernandezek, Ousmane Dramé eta Oscar Perez bizkaitarrak izanen dituzte arerio, 3.000 euro jokoan

Duela urte pare bat Donezteben jokatu zen herri kirola eta krosfit-a nahasten zituen desafioa. Orain, Nafarroa eta Bizkaiko kirolarien artean, gisako apustu bat lotu dute, abenduaren 22an jokatzeko. Alde batetik, Xabier Urrutia arraioztarra eta Iruñeko Alex Fernandez ariko dira eta, bertzetik, Ousmane Dramé eta Oscar Perez bizkaitarrak. 3.000 euro izanen dituzte jokoan, 1.500 euro bikoite bakoitzak eta oraindik erabaki gabe dute non jokatuko duten.

Bikote bakoitzak egin beharko duen lanari dagokionez, txanda librean, 80 kiloko herri bolari 80 altxaldi eman beharko dizkiote, 70 kiloko bi txingekin 20 metrioko 20 plazan egin beharko dituzte, 50 kiloko bi 50 C&J pesa, bi kolpetan altxatu beharko dituzte 50 aldiz eta arpana, 15 epai egin beharko dizkiote kanaerdikoari,

Dagoeneko itxia dute kirolariek tratua, Nafarroako Herri Kirol Federazioko Unai Bertiz lekuko zela. Orain, apusturako lekua zehaztea falta da, baina izan liteke Gipuzkoaldean edo Donezteben jokatzea.

2016ko maiatzaren 20an Donezteben jokatu zen herri kirol-crossfit apustuan arerio izan ziren Xabier Urrutia eta Alex Fernandez bikote izanen dira oraingoan.

Kirola

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun