UGEPS delakoa Nafarroa baino eremu handiagoko proiektuaren barnean kokatzen da; hots, Ederbidean; hain zuzen ere, mugaz haraindiko proiektua Interreg V-A programako (Espainia-Frantzia-Andorra) proiektuen lehen deialdian programatua da (POCTEFA 2014-2020), eta horren helburua da Iruña, Donostia eta Baiona lotzea 240 kilometroko txirrindularitza-bidearen bitartez, eta bizikleta erabiltzea sustatzea bai turismo eta aisiarako, bai eguneroko joan-etorrietarako. Nafarroan, Bidasoako eta Plazaolako bide berdeak elkartuko dira, UGEPS honen xedeko tartea, eta Plazaolako trenbide zaharra Iruñarekin konektatuko da.
UGEPS-ek definitutako ibilbideak guztira 52 kilometroko luzera du, eta honako udal-mugarteak zeharkatzen ditu: Doneztebe (Bidasoako bide berdearekin konektatzen du), Donamaria, Oiz, Urroz, Beintza-Labaien, Saldias, Basaburua, Imotz (Plazaolako bide berdearekin konektatzen du Latasan), Arakil eta Irurtzun.
Ibilbidearen zatirik handiena, luzeraren %77 baino zerbait gehixeago, banaz bertzeko trafiko motorizatuaren maila (IMD) eguneko 1.000 ibilgailutik beherakoa duten errepideetan igarotzen da, eta gainerakoa tokiko pistek, bideek eta ormigoiarekin edo zabor-legarrarekin egindakoek osatzen dute. Trazaduran, %6tik goitiko maldak daude bidearen %12tik gorako distantzian, eta %22ra bitartekoak zenbait tartetan.
Aldi berean, trazatuak Bidasoko eta Plazaolako bide berdeekin konektatzen du, Donezteben eta Latasan, hurrenez hurren. Ederbidea UGEPS-ek "Plazaolako ibilbide zaharra berreskuratzea (Irurtzun-Leitza tartea) UGEPS ordezkatzea proposatzen du Latasatik Irurtzuneraino.
Eurovelo
Horrez gain, UGEPS honen helburua da Plazaolako eta Bidasoako bide berdeak konektatzeko txirrindularitza-ibilbidea egokitzea eta Eurovelo sarearen zati bat Nafarroan osatzea (Eurovelo-1), Endarlatsatik Iruñaraino. Gogoratu behar da Eurovelo Europako Txirrindularien Federazioak zuzentzen duen proiektua dela, eta txirrindularitza-ibilbideen sarea osatu nahi duela Europako kontinentea oso-osorik konektatzeko, distantzia luzeko turistek nahiz tokiko herritarrek beren eguneroko ibilbideetan erabil dezaten. Zehazki, EV-1 Ibilbideak Norvegiako fiordoetatik hasi, eta Irlandako kostatik, Nantestik (Frantzia) Iruñatik igaro eta Portugalgo Algarveraino konektatzen du, 9.100 km inguruko ibilbidearekin. Ibilbide honen barruan sartzeko, trazatuak diseinu-irizpide batzuk bete behar ditu.