Promozio txapelketako finalean izanen dira Eloy Garcia doneztebarra eta Aritz Zubiri goizuetarra

Ttipi-Ttapa 2018ko eka. 18a, 08:15
Eloy Garcia doneztebarrak profesionaletako bere lehen partida jokatuko du, debutatu eta aste batzuetara.

Finalaurrekoan 35-31 irabazi zieten Lekunberriko Aldabe eta Martirenari 

Berriki debuta egin duen Eloy Garcia doneztebarrak bere lehen txapelketako finalerako txartela lortu du, Aritz Zubiri goizuetarrarekin bikote eginez. Lekunberriko bikotea, Aldabe eta Martirena izan zuten arerio ekainaren 16an Galarretan, eta faborito argiak hauek izan arren, Eloy eta Zubiri nagusitu ziren, 35-31. Ekainaren 30ean jokatuko dute finala, Etxabe eta Labaka edo Barricart eta Zalduaren kontra. Hauek, ekainaren 23an jokatuko dute bigarren finalaurrekoa.

Eloy Garciak eta Aritz Zubirik ezusteko handia eman zuten, dirua txapelketa guztian partidarik galdu ez zuen Lekunberriko bikotearen alde atera baitzen. Hamarnako berdinketaren ondotik, ordea, orekatua joan zen parti

da, abantaila handiegirik gabe alde batera edo bertzera. 30nako berdinketaren ondotik etorri zen tanto erabakigarria, Eloy Garciak hormabiko bikain batekin lortu baitzuen 30-31koa. Zubirik sakez egin zuen hurrengoa eta hondarreko hiruak, berriz ere Doneztebeko aurrelariak. Eloy Garciak ez zuen partida borobila jokatu, baina azkenean erabakigarria suertatu zen. 

Larunbateko partida nagusian, Xanti Uterga izan zen onena. Ionekin bikote eginez, 40-27 irabazi zieten Zeberio II.a eta Barrenetxea IV.ari. Utergak 23 tanto egin zituen eta pilota bakarra galdu zuen.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun