N-121-A, N-121-B eta NA-1210 errepideetan kamioien joan-etorria mugatzeko neurriak ekainaren 4an abiatuko dituzte

Ttipi-Ttapa 2018ko mai. 10a, 11:55
Belate eta Almandozko obren jarraipen batzordea bilkuran

Murrizketak, matrikula bakoiti eta bikoitien arabera, astero txandakatuko dira, uztailaren 15a bitarte

Belate eta Almandozko obren jarraipen batzordeak Belateko lanek irauten duten bitartean Nafarroako Gobernuak proposaturiko murrizketak aintzat hartzea ebatzi du. Horrela bada,  N-121-A, NA-1210 eta N-121-B errepideetan ibilgailu astunak murrizteko neurriak hartuko dituzte. Ekainaren 4tik uztailaren 15era bitarte indarrean egonen dira, 06:00etatik 22:00etara.

 

Murrizketak, matrikula zenbaki bakoiti eta bikoitien araberakoak izanen dira. Horrela bada, ekainaren 4tik 10era bitarteko astean matrikula bakoitia duten ibilgailu astunak baino ezin izanen dira ibili. Astero-astero, matrikula zenbakiaren arabera, txandakatuko dira neurriak. Hala, ekainaren 11tik 17ra matrikula bikoitidunak baino ez dute pasatzerik izanen.

Besteak beste, zerbitzu publikoa eskaintzen duten autobusak eta eskumenez araututako ibilgailuak salbuetsiko dira. Aitzitik, ekainaren 4tik azarora bitarte txirrindulariak eta bertatik pasa daitezkeen kirol ekitaldiak egitea debekatuko da.

Finean, murrizketek N-121-A errepideko 5,4 kilometroan (Ezkabako tunelen ondoko biribilgunean) eta 66 kilometroan (Berako sarreran); eta N-121-B (Oronoz Mugairi-Dantxarinea) eta NA-1210 (Belaten) errepidetako ibilbide osoan izanen dute eragina.

Garapen Ekonomikorako Lehendakariordeak, Manu Ayerdik, gidatutako jarraipen batzordearen hirugarren bilkura horretan Baztan, Lesaka, Doneztebe eta Sunbillako Udala, Baztan-Bidasoa Turismoa eta inguruko garraio enpresek parte hartu dute.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun