Helikopteroek lur hartzeko eremuen beharra ikusten du Gobernuak

Ttipi-Ttapa 2018ko api. 26a, 13:01
HeliNET proiektuaren arduradunak, eskualdeko udalkideekin

Larrialdi edo arrisku egoeretan irisgarritasuna bermatzea dute helburu

Mari Jose Beaumontek, Lehendakaritzako, Funtzio Publikoko, Barneko eta Justiziako kontseilariak, Nafarroako ipar-mendebaldeko udal ordezkariei HeliNET proiektua aurkeztu zien, atzo, hilaren 25ean, Bertiz Natur Parkean. Kontseilariaren hitzetan “udalerri bakoitzak helikopteroek lur hartzeko moduko gune bat behar luke, larrialdi momentuetan irisgarritasuna eta azkartasuna bermatuko duena”.

Aurkezpenean, Beaumontekin batera, barneko zuzendari nagusiak, Agustin Gastaminza,  Babes Zibileko zuzendariak, Isabel Anaultek eta HeliNET proiektuaren arduradunak, Amaya Osacarrek parte hartu zuten. Anue, Araitz, Arantza, Areso, Atetz, Bera, Donamaria, Eratsun, Etxalar, Ezkurra, Igantzi, Ituren, Lantz, Lesaka, Saldias, Sunbilla, Ultzama, Urdazubi, Zubieta, Zugarramurdiko udalkideak deituak zituzten, Felix Esparza, Oronoz-Mugairiko suhiltzaile, Bera eta Lesakako suhiltzaile boluntario eta Elizondoko Foruzaingoaren nagusi den Patxi Salvadorrekin batera.

Bilkurak HeliNET proiektuaren helburuak azaldu eta helikopteroak lur hartzeko eremuekin sare bat sortzea zuen helburu. Saretze horren bidez, larrialdi unea zeinahi delarik ere, egoera edo arriskuari aurre egiteko bideak eraiki nahi dituzte. Horretarako, Beaumontek eremuak bilatzen hasteko deia egin zien gonbidatuei. Ahal bada udalarenak diren lursailak hautatzea komeni dela jakinarazi zuen, banakoekin hitzarmenak egiteak sor ditzakeen zailtasunak saihesteko. Horren harira, helikopteroek eragozpenik gabe lur hartzeko, lursail horiek bete behar dituzten baldintzak ere mahairatu zituen.

Astelehenean Ezkarozen eginiko jardunaldiaren ondotik, bigarren aurkezpena izan da Bertizen egin dutena. Orain azpiegitura-lanak egiteko eremuak lehenestera joko dute (Nasuvinsak hartuko du ardura) eta udalek proposaturiko gune zehatzak aztertuko dituzte. Kontseilariaren hitzetan “helikopteroek ahalik eta hurbilen lur hartzen dute, baina eremu konkretu eta egokituak behar dituzte”. Toki posibleak aztertuak direlarik, Babes Zibileko teknikariek egokitasuna aztertuko dute. Egokia bada eta gaitasunik badu, proposamena zehatz idazteari ekinen diete, toki-entitateei aurkezteko.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun