Gazteen arteko truke proiektu bat da finean Hator Hona, euskal etxean euskal kulturaren inguruko ezagutza zabaltzeko. Horretarako, Euskal Herriko gazteei deialdia egin diete Necocheatik, hara joan eta ikastaroak ematearen truke egonaldi eta otorduak eskainiz. Proiektua abiatu zenetik ehun euskal herritar baino gehiago joan dira Argentinako euskal etxe horretara, eta itsasoaren alde bakoitzeko euskaldunen arteko harremana estutzea lortu da.
Hain zuzen, helburu horrekin jarri zuten abian proiektua duela hamalau urte, Harremana ez da egin bakarrik Euskal Herritik Argentinarako noranzkoan. Alderantziz ere egin da. 2008an eta 2013an Necocheako Euskal Etxeko dantza taldeak Euskal Herrira etorri baitziren bira bat egitera, eta 2012an Hator Hona proiektuan parte hartzen duten gurasoek bisita egin zuten.
Aurtengo udan Euskal Herritik Necocheara joan nahi duten gazteei gonbita egiteko kanpaina abiatu berri du euskal etxeak. Izena emateko epea maiatzaren 9ra arte zabalik dago. Ez dute irakaskuntzan inolako esperientziarik eskatzen, «irakasteko gogoa» besterik ez. Hator Hona proiektuan parte hartzeko deialdia 18 urtetik 30 urtera arteko gazteentzat da.