erran.eus

Turismo arloan Jasangarritasunaren Sarea abiatu dute Baztan-Bidasoaldean

  Gizartea  Mendialdea

Establezimenduei hondakinak gaika sailkatzeko ontziak eta konpostagailuak eman dizkiete 

Eskualde jasangarriago baterako bidean Jasangarritasunaren Sarea sortu dute Baztango Udalak eta Bortziriak eta Malerrekako Mankomunitateek. Etorkizun batean sektore guztietako talde eta erakundeei sarean sartzeko aukera eskaintzea da asmoa, baina momentuz turismoak, gure eskualdeko hondakinen sorreran duen pisua ikusita, sektore honekin abiatzeko erabakia hartu dute.

Turismo arloan Jasangarritasunaren Sarea abiatu dute Baztan-Bidasoaldean
Baztango udaleko Mikel Ortega, Malerrekako Mankomunitateko Amets Inda eta Baztan Bidasoa Turismoa erakundeko Patxiku Irisarri aurkezpenean. | Ikusi handiago | Argazki originala

 

Martxoaren 9an egin dute Sarearen aurkezpena Bertizen, interesa agertu duten lehendabiziko 21 establezimentu turistikoei beharrezko materiala banatuta, egitasmoak bere ibilbide publikoa hasi du. Lehendabiziko urratsak, ordea, lehenagotik emanak zituen. Izan ere, iaz eskualdeko establezimendu turistiko guztiei ideiaren inguruko inkesta bat bidali zitzaien. Bertan, egitasmoaren berri emateaz gain, parte hartzeko interesa eta honetarako jarriko lituzketen baldintzen berri galdetu zitzaien. Jasotako erantzunekin eraiki zen gainerakoa.

Sarean sartu ahal izateko establezimendu turistikoetako jabeek hainbat konpromiso hartzen dituen eta, era berean, zenbait eskubide ematen dizkien agiria sinatu behar dute. Bertzeren artean, hondakinak sailkatzeko ontziak jarri behar dituzte beren establezimenduetan eta bezeroak eskualdeko hondakinen kudeaketaren inguruan informatu behar dituzte. Gai organikoa ere kudeatu behar dute. Trukean, hondakinak gaika sailkatzeko ontziak eta konpostagailuak emanen dizkiete, baita bezeroei informazioa helarazteko foileto eta kartelak ere.

Esta­ble­zimenduek jasanga­rritasunaren alde hartutako konpromisoa berresten duen eta beren promoziorako erabiltzen ahalko duten logo-marka eta diploma eskuratuko dituzte eta ordaintzen duten hondakin-tasan hobaria izanen dute.

Baztango Udalak eta Bortziriak eta Malerrekako Mankomunitateek bereziki eskertu nahi dituzte ekimena martxan jartzea ahalbidetu duten eta horretarako lehen urrats honetan izena eman duten establezimentu turistikoak:

Baztanen: Amaiurko Jaimeneko Borda eta Enekoneko Borda, Anizko Jauregia, Arizkungo Gontxea, Arraiozko Serorenea, Berroetako Peregarnea, Elbeteko posada, Erratzuko Barazabal eta Kordoa, Lekarozko Mikelenea, Zigako Gamiokoborda, Elizondoko Urruxka, Larraldea eta Markullukoborda eta Itzalargikoborda Hostala.

Bortzirietan: Berako Iratxekoberea  eta Etxalarko Gainkoborda, Peruarnea eta Perugorria berria landetxeak.

Malerrekan: Donamariko benta eta Iturengo Abaraun aterpetxea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa