Maiatzaren 1etik ekainaren 30era irekiko da amuarrain arrantza denboraldia. Azken bi denboraldietan bezala, eguneko bi amuarrain baino gehiago ezin izanen ditu hartu arrantzale bakoitzak. Ibai nagusietan nahiz erreka ttikiagoetan guttienez 23 zentimetroko aleak atera daitezke. Ezkurra errekan, Elgorriaga parean, arrantzatu eta aske uzteko eremu berri bat izanen da.
Izokin arrantzan lehenagotik hasteko aukera izanen da aurten, apirilaren 15ean, eta, amuarrainarekin bezala, baimen sistema berezia izanen dute aurten izokin-arrantzaleek. Maiatzaren 28tik ekainaren 13ra arrantzarako debekua ezarriko da. Orain arte, izokin-arrantzaleek ezin izan zuten denboraldiko hiru ale baino gehiago arrantzatu eta aurten kendu egin dute muga hori.