Oharriz eta Erratzuko estazioetan neurtutako datuen arabera, Baztan ibaiaren egoera egonkorra dela dio Babes Zibileko zerbitzuak.
Legasan dago Bidasoa ibaiko estazioa eta ibaia 3,20 metroko mailan dagoela ikusi dute eta gorako joera duela. Atzo 20:00etan 2,48 metrokoa zen maila. Jarraipen maila 2,50 metrotan ezarria dute eta aurre-alerta eta alerta mailak 4 eta 4,60 metrotan, hurrenez hurren. Bere emaria 125 metro kubiko segundokoa da, eta atzo gaueko lehen orduetan 90,60koa zen.
Bertzalde, Ereñotzun (Hernani) Urumea ibaiak 3,72 metroko maila duela neurtu dute, eta atzo 20:00etan 3,32 metrokoa zen. Jarraipen maila 3,20 metrotan ezarria dute, aurre-alerta 4 metrotan aktibatzen dute eta alerta 4.40 metrotan. Bere emaria 125 metro kubiko segundokoa da. Babes Zibilak jakinarazi du nabarmen igo dela emaria, atzo gaueko lehen orduetan 94 metro kubiko segundokoa baitzen, baina halere, joera egonkorra dela dio.
Babes Zibileko arduradunek oraingoz ez dela uholde garrantzitsurik izan adierazi dute, eta sare nagusiko errepideetan normaltasunez ibil daitekeela. Halere, arretaz gidatzeko aholkatu dute errepidean putzuak egon daitezkeelako.