erran.eus

Patxiku Irisarri etxalartarra da Baztan-Bidasoa Turismoa erakundeko presidente berria

  Gizartea  Mendialdea

Urteko batzarrean 2017ko balantzea egin eta 2018ko egitasmo eta aurrekontuak ere onartu dituzte

Baztan-Bidasoa Turismo Elkargoak urte hasierako batzar orokorra egin berri du, 2017ko balantzea egitearekin batera, 2018ko egitasmoak eta aurrekontuak onartzeko. Balantzearen emaitzak positiboak izan dira, eta aurrekontu kontinuistak ez ezik, lehendakari aldaketa ere onartu da. Horrela bada, orain artean Mikel Albisuk zuen lehendakari lekukoa Patxiku Irisarri etxalartarrak hartu du. Apartamentuen ordezkaritza, berriz, Haizea Destribatseri egokitu zaio.

Patxiku Irisarri etxalartarra da Baztan-Bidasoa Turismoa erakundeko presidente berria
Patxiku Irisarrik hartu du Mikel Albisuren lehendakari postua. | Ikusi handiago | Argazki originala

 

Baztan-Bidasoa Turismoak, urratsez urrats eskualdea eremu turistiko gisa indartzea du helburu. Eta bide horretan, bidelagun gehiago izateko, hotel, landetxe, jatetxe, jarduera enoresa eta turismoarekin loturiko establezimendu guztiei kide egiteko gonbidapena luzatu die. Gaur egun 80 bazkide ditu. Interesdunek 948 592323 telefonora deitu edo info@baztan-bidasoa.com helbidera idatzi beharko dute.

 

2017ko balantzea

2017 urteak 2.478,53 euroko diru-sarrerekin itxi dute. Iragan den urte hori turismo sektorean ona izan dela iritzi du Elkargoak. Hori horrela, ez dio muzin egin turismo gorakadak sortutako eztabaidari. Bertako ondare, kultura, natura, tradiio, bizimodu eta hizkuntza errespetatuko dituen kalitatezko landa turismoa sustatu nahi du.

 

2018a proiektuz josia

Urte hasieratik 18 egitasmo aurkeztu eta onartu ditu batzar orokorrak. Bertzeak bertze, web gunea eta erreserbak egiteko informazio zentroaren eraberritzea; ‘Zer-Egin Baztan-Bidasoan’ eskuorriaren berredizioa; bisita gidatuen eskuorria; eta baliabide-gidaren berredizioa. Balibideen gida, Elkargoak bi urtetik behin kaleratzen duen aldizkaria da, eta horren garrantzia, bereziki, Ferietako presentzian datza.

2018an ez dute hutsik eginen Ehiza Jardunaldi Gastronomikoek. 26. edizioa beteko dute. Bere garaian bisitarien estazionalitateari aurre egiteko sortutako jardunaldiak, egun, Baztan-Bidasoko udazkeneko egutegian erreferente bilakatu dira.

Mugaz gaindiko egiatasmoetan lanean dihardu Baztan-Bidasoa Turismoak. POCTEFA egitasmoaren baitan, EDERBIDEA proiektuko kide da, Nafarroako Gobernua, Gipuzkoako Foru Aldundia, Pirinées Atlantiques eta Cederna Garalurrekin batera.

Honen baitan aurten, “Ederbidea jardunaldia/ Bizikleta eskola” burutuko da eta “Mapa Ziloturista/EderbideaII” kaleratuko da. Mapa kaleratzeko, eskualdeko Udalekin harremanetan jarri da Baztan-Bidasoa Turismoa, mapan Bide Berdea igarotzen den herrietako ibilbideak agertzeko.

Egitasmo horiek guztiak aurrera eramateko, 64.305 euroko aurrekontua onartu du.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa