Donezteben XII. edizioa
San Silbestre egunean, urteroko hitzordua izanen dute Donezteben Erreka Kirol Elkartearen eskutik. 18:00etan, udaletxetik, abiatuko dira 2003a baino beranduago sorturikoak eta zirkuitoari buelta bat emanen diote. Ondotik, helduek, 3,5 kilometro eginen dituzte. Irabazleei sariak emateaz gainera, parte-hartzaile guztientzat opariak eta guztien artean eginen diren zozketak borobilduko dute XII.edizioa.
Elizondon IX. edizioa
Baztango Lasterketa Taldeak antolatuta, Elizondon 17:00etan ekinen diote lasterketari 12 urtetik beheitikoek; 18:00etan, berriz, helduek. Nagusiek 3,9 kilometroko lasterketa eginen dute. 17:30ean izanen da izen-ematea, eta euro bat ordaindu beharko dute. Haurrek, aldiz, dohainik parte har dezakete.
Bortzirietako elkartasun keinua
V. Bortzirietako elkartasun keinua eginen dute urteko azken egunean Lesakan, Sare Lesakak antolaturik. Aurtengoan, igandea izaki, eguerdian eginen dute eta ez arratsaldean, aitzineko lau ediziotan bezala. 13:00etan abiatuko dira, Plaza Zaharretik eta 3,9 kilometroko lasterketa eginen dute. Izen-ematea egunean bertan eginen da, lasterketaren aitzinetik.
Leitzan Anikotek antolatuko du
Azkeneko urteetan Guraso Elkarteak antolatzen zuen San Silbestre lasterketa Anikote enpresa publikoak antolatuko du aurtengoan. Igandean 16:30etik hasi eta adin tarte guztietakoak izanen dute ateratzeko aukera, ibilbide ezberdinak eginez. Izena egunean bertan emateko aukera izanen dute lasterkariak. Horretaz gain 2018ko kirol egutegia argitaratu du Anikote enpresak.