erran.eus

Euskarazko Produktuen Katalagoa banatu dute eskualdeko euskara zerbitzuek

  Kultura  Mendialdea

Paperezko edizioa banatu dute 16 urte bitarteko haur eta gaztetxoen artean eta webgunean ere erabil daiteke urte osoan 

Baztan, Malerreka, Bortziriak eta Leitza, Arano, Goizueta eta Aresoko euskara zerbitzuek Euskarazko Produktuen Katalogoaren paperezko edizioa banatu dute 16 urte bitarteko haur eta gaztetxoen artean. Webgunean ere badago, urte osoan erabiltzeko moduan.

Euskarazko Produktuen Katalagoa banatu dute eskualdeko euskara zerbitzuek
Paperezko edizioaren 125.000 ale banatu dituzte. | Ikusi handiago | Argazki originala

 

Urteko garai honetan seme‐alabei edo ingurukoei euskarazko liburu, musika edota jostailu eta jokoak erosi eta opari egiteko aukera paregabea izaten da. Erabiltzaileari lana errazteko, Euskarazko Produktuen Katalogoaren 19. edizioa osatu berri dute. Katalogoa eskualdeko euskara zerbitzuek Euskal Herriko 140 bat udal eta mankomunitatetako euskara zerbitzuekin elkarlanean prestatzen dute.

 

Bilaketak erraz egiteko antolatua

Horrela bada, katalogoko produktu guztien artean bilaketa arindu eta errazteko, bai webgunea zein paperezko edizioa bi atal nagusitan banatuak aurkituko ditu erabiltzaileak: 0‐12 urte bitarteko haurrentzako produktuekin osatua den atala batetik, eta bestetik, 12‐16 urte bitarteko gazteentzako produktuekin osatua dena. Webgunean, Bilaketa aurreratua dioen ataltxoan klikatuz gero, bilaketa hainbat parametro elkarren artean konbinatuz ere egin daiteke, konparaziora: produktu mota, prezioa eta argitaratze urtea bilatuz; edota argitaletxea, produktu mota eta adina; eta horrela nahi beste konbinazio.

 

Web orrian informazio eguneratua eta paperean baino askoz ere produktu gehiago

Durangoko Azokari begira argitaletxeek azkeneko orduan ateratzen dituzten berrikuntzak, epeengatik paperezko edizioan jaso ezin direnak, KATALOGOA.EUS webgunean aurkituko ditu erabiltzaileak. Izan ere, KATALOGOA.EUS urte osoan berritzen doan webgunea baita, nobedadeak sartuz, deskatalogatu diren produktuak kenduz eta, beraz, etengabe hazten ari da jasotako erreferentzien kopurua. Dagoeneko 6.000 produktu inguru biltzen ditu 2 atal nagusien artean.

 

 

Bilatu, aukeratu eta zuzenean argitaletxera iristeko aukera ematen du KATALOGOA.EUSek

Behin bilaketa egin ondotik, produktu bakoitzaren fitxan hari buruzko daturik garrantzitsuenak ikusiko ditu erabiltzaileak (azalaren irudia, titulua, autorea, argitaletxea, produktuari buruzko azalpena, argitaratze urtea, prezioa, e.a.) eta, bakarren bat begiz joz gero, argitaletxearen webgunera sartzeko esteka izango du Non eskuratu botoian klikatuta.

 

 

KATALOGOA.EUSetik beste webgune interesgarri batzuetarako sarbidea eskaintzen da 

Hasieran aipatu bezala, KATALOGOA.EUS webguneak bi atal nagusi ditu: 0‐12 urte bitarteko haurrentzako produktuekin osatua bata, eta 12‐16 urte bitarteko gazteentzako produktuekin osatua bestea. Eta ez hori bakarrik, horietako atal bakoitzak hainbat baliabide eskaintzen ditu bi adin tarte nagusi horiei egokituak: intereseko web orrien loturak, kultura eta aisialdirako agenden loturak, eta Facebook eta Twitter sare sozialen bitartez jarraipena egiteko aukera.

 

Era berean, webgunetik aldian‐aldian argitaratzen diren nobedadeen erreferentziak jasotzen dituen buletin elektronikora harpidetzeko formularioa eskaintzen du eta baita paperezko bertsioaren pdf‐a deskargatzeko manera ere.

 

Paperezko edizioak 125.000 ale

Egunotan banatuko dira paperezko edizioaren 125.000 aleak Nafarroan, Araban, Bizkaian eta Gipuzkoan. Ale bat eskuartean duenak, berehala ohartuko da bi azal dituela paperean editatzen den katalogoak: azal batek 12‐16 urte bitarteko gazteentzat eskaintzen diren produktuei ematen die sarbidea, eta beste aldeko azalak 0‐12 urte bitarteko haurrentzako produktuei eta gurasoentzako materialeei.  Horrela, bilaketa errazteaz gain, nortasun propioa ematen zaio adin tarte bakoitzari. Jakina, paperezko edizioak ez ditu jasotzen KATALOGOA.EUS webgunean jasota dauden 2017ko produktu guzti‐guztiak, atalka antolatutako hautaketa bat baizik: musika, DVDfilmak, aldizkariak, komikiak, liburuak, jostailu eta jokoak eta gurasoentzako materiala.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa