Oiartzungo Altzibar auzotik (Albisturreko aparkalekutik, 08:30ean abiatuta) Eskasera, trenak egiten zuen bidea egiteko aukera izango da, azalpenak entzunez. Oinez, txirrindaz edo korrika egiteko aukera izango da. Oinezkoei azalpenak Anton Mendizabalek eta Suberri Matelok emango dizkiete, eta txirrundulari eta korrikalariei, Felipe Mitxelenak.
Zaldingo pilota-soroa berreskuratuko da
Artikutzako trenari buruzko azalpenak entzuteaz gain, Zaldingo pilota-soroan bote luzeko partida bat ikusteko aukera izango dute hurbiltzen direnek (eguraldiak lagunduz gero). Bueltarako, autobusa izango da Eskasetik, 11:30etik aurrera, dohainik.
Liburu aurkezpena, ostiralean
Mugarria elkartearen eskutik argitaratutako Artikutzako trena liburua ere aurkeztuko dute ostiralean. Bi egileek, Anton Mendizabal eta Suberri Matelok, ostiralean aurkezpen ofiziala egingo dute Oiartzungo udaletxeko areto nagusian, 19:00etan.
