Ingude altxatzen errekorra hobetuz lortu du Nafarroako txapela Maika Ariztegik

Ttipi-Ttapa 2017ko uzt. 14a, 07:57
Maika Ariztegik marka bikaina egin du, txapela janzteaz gain. Argazkia: Diario Noticias

Gizonezkoetan ere Josetxo Urrutia leitzarra izan da txapeldun

Iruñeko Sanferminetatik eskualdera datorren herri kirol txapelen uzta emankorra izaten ari da aurten. Oraingoan, Nafarroako txapela ez ezik Euskal Herriko marka berria ezarri du ingude altxatzen Maika Ariztegi iturendarrak 99 altxaldi eginez. Gizonezkoetan Josetxo Urrutia leitzarrak lortu du txapela.

 

Ingude altxatzen 9 kiloko ingudeari 99 altxaldi eman zizkion minutu eta erdian Maika Ariztegik, marka berria eta bikaina ezartzeko. Virginia Finol izan zen bigarren (92 altxaldi), Antsoaingo Irune Biurrun hirugarren (83 altxaldi) eta Elgorriagako Irune Izkue laugarren (79 altxaldi).

Gizonezkoetan, 18 kiloko ingudea zuten lanerako eta Josetxo Urrutia leitzarrak 87 altxaldi eman zizkion eta Berako Aritz Izuzkizak eta Berriozarko Imanol Martinek 83na. Berakoak lortu zuen bigarren postua, pisuz arinena delako.

XIX. San Fermin Motozerra sarian bi irudi egin behar izan zituzten motozerrarekin. Juan Asin izan zen txapelduna, Mikel Lasarte bigarren eta Peio Kañamares hirugarren.

 

Azken txapela, harri jasotzekoa

Gaur eguerdian, Nafarroako harrijasotze txapelketa erabakiko da, herri kiroletako azken jardunaldian. Leitzako Josetxo Urrutia eta Etxalarko Xabier Ariztegi ‘Santxin’ izanen dira eskualdeko ordezkariak eta Iruñeko Albaro Zugarrondo ere ariko da. Hiru harri ezberdinekin bi minutuko txandak egin beharko dituzte (125 kiloko zilindroa, 112,5 kiloko kubikoa eta 100 kiloko bola). Aizkora erakustaldia eskainiko dute Iker Vicentek eta Ruben Saralegik eta motozerra erakustaldia Mikel Lasartek.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun