Gizonezkoetan, Fernando Etxegaraik 6 minutu eta 8 segundo behar izan zituen 50 koxkorrak biltzeko. Elgoibarko ikastolako frontoiak neurririk ematen ez zuela eta, bertze modu batera antolatu behar izan zituzten koxkorrak eta beraz, ez da marka homologatua izanen. Halere denbora bikaina egin zuen Berako kirolariak hamargarren txapela janzteko (6:08). Bigarren, Aritz Ruiz arabarra izan zen (6:25) eta hirugarren, gaur egungo Nafarroako txapeldun den Unai Iantzi aniztarra (6:31). Gibeletik sailkatu ziren Eneko Garmendia gipuzkoarra (6:43), Michel Guilçou lapurtarra (6:44), Aritz Martin bizkaitarra (6:52), Jon Goikoetxea gipuzkoarra (7:05), Guillermo Lopez arabarra (7:17) eta Sendoa Larrea bizkaitarra (7:22)
Emakumezkoetan, hamalau aldiz jantzi du Euskal Herriko koxkor biltze txapela Maika Ariztegi iturendarrak, azken hamahiruak segidan. Azkenekoa iaz Igantzin, baina hurbilean izan zuen Zuriñe Frutos arabarra. Azaroaren 12an Elgoibarren jokatu zen saioan, ordea, krossetan eta mendi lasterketetan ere aritzen den Zurie Frutos arabarra ongi nagusitu zen, 7 minutu eta 17 segundoko denborarekin. Maika Ariztegi iturendarra izan zen bigarren, 40 segundora (7:57) eta lehen aldiz parte hartu duen Beintza-Labaiengo Irune Izkuek osatu zuen podiuma (8:20).
Goizalde Aransolo (8:43) eta Ainhoa Ortega (8:53) bizkaitarrek ere lehen aldiz parte hartu zuten eta laugarren eta bosgarren postuak eskuratu zituzten.