Bina kanaerdiko, bina 60 ontzako eta oinbiko bat moztu behar zituzten, finaleko lanaren erdia. Otsagiko Iker Vicentek 15 minutu eta 22 segundo behar izan zituen lana burutzeko; Jon Rekondo leitzarrak 16 minutu eta 9 segundo, Lezaungo Juanjo Lopezek 16 minutu eta 35 segundo eta Leitzako Ruben Saralegik 17 minutu eta 16 segundo. Lehiarik handiena, finalerako azken txartela ematen zuen bosgarren posturako izan zen: Arantzako Donato Larretxeak lortu zuen, 18 minutu eta 3 segundo denborarekin. Arostegiko Julen Kañamaresek 3 segundo gehiago behar izan zituen (18:06) eta Aurtizko Ander Erasunek 20 segundo gehiago (18:23). Zortzigarren postua Olagueko Aitor Senosiainek eskuratu zuen (20:30) eta maila galtzea zekarren bederatzigarren postuan Aresoko Asier Pellejero sailkatu zen (26:07).