Endika saldiastarrak eta Ionek lortua dute finalerako txartela eta bertze bikote finalista ortziral arratsean erabakiko da
Nafarroako erremonte txapelketaren hamekagarren edizioko finala irailaren 25ean, igande arratsaldeko 5etan jokatuko dute Zubirin, Esteribako kiroldegiko pilotalekuan. Hasierako faseko hiru partidak irabazi dituzten Endika eta Ionek lortua dute finalerako txartela. Bertze finalista irailaren 23an, ortziral arratseko 11:30ean jokatuko den finalerdian erabakiko da. Xanti Uterga eta Joxe Etxeberria III, Josetxo Ezkurra II eta Barrenetxea IV.aren kontra ariko dira Uharteko Toki Alai pilotalekuan.
Igandean Zubirin jokatuko den jaialdian, final nagusiaz gain, bigarren mailakoa ere jokatuko dute Goikoetxea V eta Azpirozek, Erburu eta Otanoren kontra. Gainera, Paz Ziganda ikastolako helduen abesbatzak ere emanaldia eskainiko du, Nafarroan minbizia duten umeen senideak biltzen dituen ADANO elkartearen aldeko jaialdia izanen baita. Jaialdiko sarrera doan izanen da, baina ADANOko boluntarioek janari produktuen bi loteen zozketarako baliagarriak diren boletoak salduko dituzte, 5 euroren truke.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.