Sokatiran, 640 kiloko kategorian, Lesakako Beti Gaztekoak ariko dira; koxkor biltzen Anizko Unai Iantzi ariko da: 1,25 metrotara paratutako 50 koxkorrak bildu beharko ditu; lasto altxatzen Amaiurko Iñigo Goienetxe ariko da. 45 kiloko lastoa ahalik eta gehien altxatu beharko du bi minutuz. Harriarekin Xabier Ariztegi etxalartarra ariko da eta 100 kiloko harriari ahalik eta altxaldi gehien eman beharko dizkio bi minutuz. Txingekin, Miguel Angel Sukuntza leitzarra ariko da. 50 kiloko txingekin ahalik eta plaza gehien egin beharko ditu.
Nafarroako taldea osatuko duten gainerako kirolariak hauek izanen dira: ingude altxatzen Imanol Martin (Berriozar) ariko da eta 18 kiloko ingudeari ahalik eta altxaldi gehien eman beharko dizkio; orga jokoan Albaro Zugarrondo (Iruñea) ariko da; 80 kiloko zakuarekin Iñaki Iraizoz (Esain), Oskar Aguas (Berriozar) eta Oier Aizkorbek (Berriozar) 360 metro egin beharko dituzte; arpanean Iñaki eta Josetxo Barberenak (Iraizoz) 45 ontzako enborrari 10 ebaketa eman beharko dizkiote eta aizkoran Iker Vicente (Otsagabia) ariko da, 45 ontzako lau enbor moztu beharko ditu.