Txapelketa ohikoak ez diren pilotalekuetan jokatuko dute. Honela, hasteko, finalerdietako joaneko lehen partida Aizarnazabalen jokatuko dute maiatzaren 6an Urriza eta Zalduak, Segurola eta Endikaren kontra. Ortziralean 22:30ean hasiko da jaialdia herriko pilotalekuan bertze erremonte partida batekin eta gero txapelketakoa jokatuko da. Finalerdi honen itzulerakoa Errenterian jokatuko dute ekainaren 5ean. Bertze finalerdian, Uterga eta Aizpuru III, Ansa II eta Barrenetxea IV.aren kontra ariko dira. Lehen partida maiatzaren 15ean, 17:30ean Pasai Antxoko pilotalekuan jokatuko dute eta itzulerakoa Zestoan maiatzaren 20an. Finalerdietako partida guztiak 3 0 tantura jokatuko dituzte.
Finalerdietako irabazleek, finala jokatuko dute ekainaren 12an, 12:00etan Zumarragako Beloki pilotalekuan. Finala 35 tantura jokatuko da eta aitzinetik eskuz binakako partida izanen da.